-Cyfle i Gwmnïau Lleol gael eu "Traed dan y Bwrdd"!

Mae cwmnïau lleol bob amser yn chwilio am gyfleoedd i ddenu mwy o gwsmeriaid a byddai'n well gan rai o'n sefydliadau mwy yma ym Mae Abertawe brynu'n lleol petaent yn gallu dod o hyd i'r cwmnïau priodol i weithio gyda hwy. Yn aml iawn mae llawer ohonynt yn colli ei gilydd neu o leiaf byth yn cael cyfle go iawn i gwrdd.

Yn ffodus, mae pethau'n newid, ac yn helpu i hybu'r newid hwnnw er gwell y mae'r fenter Datblygu Cyflenwyr Lleol, a gynhelir yn ardal Bae Abertawe gan Ganolfan Fusnes Abertawe a Chyswllt Busnes Castell-nedd Port Talbot, gan gynorthwyo busnesau bach lleol i fasnachu â'u cymdogion mwy, boed y rheiny yn y sector preifat neu gyhoeddus.

Mae busnesau lleol eisoes wedi elwa o'u hymdrechion drwy ennill gwaith y mae'n bosib na fyddent fel arall yn ymwybodol ohono:-

Aeth Dean Heath o DG Heath, busnes teulu o Bontarddulais sy'n arbenigo mewn lloriau pren caled, laminad a ffensys, i ddigwyddiad "Cwrdd â'r Prynwr" ym mis Mai 06 a drefnwyd gan Ddatblygu Cyflenwyr Lleol, gan gwrdd â sawl sefydliad sector cyhoeddus. O ganlyniad uniongyrchol i'r cyfarfodydd hynny, mae'n derbyn archebion rheolaidd gan ddau sefydliad sydd wedi dod i bron £30,000 yn ystod y 6 mis diwethaf. Dywedodd Dean Heath; “Dyma'r dechrau yn unig, am ein bod yn dal i dderbyn archebion. I ddechrau gwnaethom ymuno â'r rhestrau cyflenwyr cymeradwy ar gyfer sawl sefydliad, ond ychydig iawn o waith a gawsom drwy wneud hynny yn unig. Y gwahaniaeth oedd cael cyfle i gynnal cyfarfodydd wyneb yn wyneb â'r prynwyr a dangos yn union beth mae ein busnes yn gallu'i wneud. Mae hyn wedi gwneud gwahaniaeth mawr. Mae'n sicr yn werth mynd i'r digwyddiadau hyn”.

Aeth Ken Wheeler o Phonelink yn Abertawe, sy'n cyflenwi ac yn gosod systemau ffôn a rhwydweithiau data, i i ddigwyddiad Cwrdd â'r Prynwr cynharach, gan fynd o nerth i nerth ers hynny. Mae cyfarfod gydag un sefydliad yn arbennig wedi'i helpu i sicrhau gwerth mwy na £34,000 o waith hyd yma. Meddai Ken, "Fe'n gwahoddwyd i wneud cryn dipyn o waith yn dilyn ein cyfarfod yn y digwyddiad Cwrdd â'r Prynwr. Rwy'n siŵr bod proffil y cwmni wedi codi trwy fynd i'r digwyddiadau hyn a bod cyfleoedd contractio eraill wedi dod i'r amlwg o ganlyniad iddo.”

Daw llwyddiant yn y digwyddiadau hyn o gyfeiriadau annisgwyl hefyd. Cafodd 'Rock Monkeys' gais am waith gan ysgol leol a oedd yn chwilio am weithgaredd amgen i ddifyrru'r plant. Mae wal ddringo symudol Rock Monkeys yn darparu hyfforddiant dringo yn y lleoliad mewn ysgolion, grwpiau ieuenctid ac yn y gweithle.

Meddai Helen Beddow, Cydlynydd Datblygu Cyflenwyr Lleol Abertawe, "Dyma rai enghreifftiau yn unig o'r llwyddiant y gellir ei gyflawni. Nod y digwyddiadau hyn yw helpu busnesau lleol i gael eu 'troed dan y bwrdd' gyda sefydliadau allweddol yn ein hardal. Mae Prynwyr yn y Sector Cyhoeddus yn cefnogi ein digwyddiadau'n frwd ac yn croesawu'r cyfle i gysylltu â chwmnïau lleol yn y gobaith o ddod o hyd i gyflenwyr. Gobeithiwn hefyd y bydd mwy o sefydliadau'r sector preifat yn ymuno â ni fel prynwyr i helpu i chwarae eu rhan yn economi Bae Abertawe.”

Cynhelir mwy o ddigwyddiadau Cwrdd â'r Prynwr ledled Cymru gan y Prosiect Datblygu Cyflenwyr Lleol. I gael mwy o wybodaeth am yr hyn sydd ar gael, ewch i'r dudalen ddigwyddiadau ar wefan y siop gytundebau, neu cysylltwch â'r Hyrwyddwr Cyflenwyr yn eich ardal chi. http://www.contractshop.co.uk/

I gael mwy o wybodaeth am Ddatblygu Cyflenwyr Lleol, y Siop Gytundebau a digwyddiadau yn y dyfodol, cysylltwch â Helen Beddow yn y Ganolfan Fusnes ar 01792 545076 neu Alan Doyle, Hyrwyddwr Cyflenwyr yng Nghyswllt Busnes ar 01792 817575. 

_{Busnes teulu hen sefydledig ym Mhontarddulais yw DG Heath Timber Products Ltd sy'n arbenigo mewn dosbarthu lloriau pren caled a laminad solet, ffensys, paledi plastig a phecynnu plastig y gellir ei ailddefnyddio yn ogystal â chynhyrchu paledi a chasys pren. I gael mwy o wybodaeth, cysylltwch â Dean Heath ar 01792 884828, www.dgheath.co.uk}  

_{Cwmni o Abertawe yw Phonelink a sefydlwyd ym 1994 i gyflenwi a gosod Systemau Ffôn a Rhwydweithiau Data. Mae ganddo enw da am ansawdd a gwasanaeth, gan arbenigo ym mhob agwedd ar Delathrebu, rhwydweithiau Data, technoleg Ffeibr, cysylltedd Di-wifr, Protocol Llais dros y Rhyngrwyd (VOIP), Gosod a Chynnal a Chadw. I gael mwy o wybodaeth cysylltwch â Ken Wheeler neu David O’Rourke ar 01792 875999, www.phonelink-inst.co.uk.}

  _{Mae Wal Ddringo Symudol Rock Monkeys yn darparu hyfforddiant dringo yn y lleoliad mewn ysgolion, i grwpiau ieuenctid ac yn y gweithle gan osgoi problemau cludiant costus sy'n cymryd amser. Y nod yw annog pobl o bob oedran i gymryd rhan mewn gweithgaredd awyr agored diogel, cyffrous, deinamig ac anturus. I gael mwy o wybodaeth, cysylltwch â Liz Davies ar 01792 366062, www.rockmonkeys.co.uk}